Աստանայում մեկնարկած Շանհայի համագործակցության կազմակերպության գագաթնաժողովի շրջանակում հանդիպել են Ռուսաստանի և Ադրբեջանի նախագահները:

Բանակցությունների ընթացքում քննարկվել է նաև Հայաստանի և Արբեջանի միջև հարաբերությունների կարգավորման գործընթացը։

«Միշտ պատրաստ ենք աջակցել Հայաստանի և Ադրբեջանի միջև հարաբերությունների կարգավորմանը և խաղաղության օրակարգի առաջմղմանը։ Մոսկվայի և Բաքվի շփումների ծավալը մեծ է։ Եթե ամեն ամիս էլ հանդիպենք, միևնույն է խոսելու բան կլինի»,- ասել է Վլադիմիր Պուտինը։

Իլհամ Ալիևն իր հերթին Վլադիմիր Պուտինին ներկայացրել է Հայաստանի և Ադրբեջանի միջև հարաբերությունների կարգավորման ներկայիս գործընթացը։

«Ցանկանում եմ նշել ենթակառուցվածքների ոլորտում մեր ծրագրերը, առաջին տեղում է Հյուսիս-հարավ մայրուղին։ Հնարավորություններ կան այդ թվում՝ էներգետիկայի և արդյունաբերական ոլորտներում»,- շեշտել է Պուտինը: Ըստ Կրեմլի հաղորդագրության՝ նա բարձր է գնահատել Ադրբեջանում ռուսաց լեզվի ուսուցման նկատմամբ Իլհամ Ալիևի ուշադրությունը:

Ադրբեջանի նախագահը, իր հերթին, ուրախալի է որակել այն փաստը, որ ավելանում են ազգային արժույթներով փոխադարձ հաշվարկները:

Նա ևս անդրադարձել է Հյուսիս-հարավին: «Վճռական ենք՝ ընդլայնելու միջանցքի ենթակառուցվածքն Ադրբեջանի տարածքում, թեև այն ֆիզիկապես գոյություն ունի, այնուհանդերձ չի համապատասխանում նախագիծն առավելագույնս օգտագործելու՝ մեր գործընկերների և հարևանների մտադրություններին»,- ասել է Ալիևը։

«2022 թվականին դաշնակցային գործակցության հռչակագիր ենք ստորագրել: Արդեն ավելի քան 2 տարի է՝ աշխատում ենք որպես դաշնակիցներ և լավ արդյունքներ ենք ցույց տալիս»,- եզրափակել է Ադրբեջանի նախագահը:

Աստանայում անցկացվող Շանհայի համագործակցության կազմակերպության գագաթնաժողովի շրջանակում կայացել է նաև Ադրբեջանի նախագահի հանդիպումը Ղազախստանի նախագահի հետ:

Իլհամ Ալիևը շնորհակալություն է հայտնել Կասիմ-Ժոմարտ Տոկաևին Բաքվի և Երևանի միջև բանակցային գործընթացներին աջակցելու համար:

Այս մասին հայտնել է Տոկաևի մամուլի ծառայությունը:

Ըստ նույն աղբյուրի՝ կողմերը քննարկել են առևտրատնտեսական, մշակութային և հումանիտար համագործակցության հետագա խորացման հեռանկարները։ Տեղի է ունեցել մտքերի փոխանակում միջազգային կազմակերպությունների շրջանակներում հետագա փոխգործակցության հարցերի վերաբերյալ։

Համացանցում, մասնավորապես` «Facebook» և «Instagram» սոցիալական կայքերում տարածվում է գովազդ, որով անհայտ անձինք ոստիկանության անունից ֆինանսական խարդախություններից տուժած անձանց առաջարկում են վերադարձնել կորցրած գումարները:

Այս մասին տեղեկացնում է ՀՀ ոստիկանությունը:

«Մուտք գործելով իբր գումարի վերադարձման համար նախատեսված դիմումի էջ` քաղաքացիներից պահանջում են լրացնել անձնական տվյալներ՝ կորցրած գումարի չափը, փոխանցման տարբերակը (բանկային քարտով կամ կրիպտոարժույթով), անուն, ազգանուն, էլեկտրոնային հասցե, հեռախոսահամար:
Որոշ ժամանակ անց օտար լեզվով խոսող անձինք զանգահարում են նշված հեռախոսահամարին և կորցրած ֆինանսական միջոցները վերադարձնելու համար, իբր օրենքով նախատեսված կարգով, պահանջում գումար:
ՆԳՆ Ոստիկանությունը հորդորում է զերծ մնալ անծանոթ կայքերում կամ էջերում անձնական տվյալներ լրացնելուց, իսկ նշված հանցագործությունների հետևանքով ֆինանսական կորուստներ ունենալու դեպքում դիմել Ոստիկանություն»:

Հուլիսի 1-ին, արտառոց դեպք է տեղի ունեցել Երևանում։ SHAMSHYAN.com-ի տեղեկություններով ժամը 18։20-ի սահմաններում ՀՀ Ներքին գործերի նախարարության ոստիկանության  Մաշտոցի բաժին օպերատիվ տեղեկություններ են ստացվել, որ  Դավիթաշեն 2-րդ թաղամասի 31 շենքի 5-րդ հարկի շքամուտքից ոմն «Հրոյի» որդին իր ընկերների հետ միասին շանը նետել է ցած:

Ոստիկանները տեղում պարզել են, որ ոմն Հրոն և նրա որդին դաժան ծեծի են ենթարկել անտուն շանը, իսկ հետո  նշված շենքի 5-րդ հարկի շքամուտքից շանը նետել են ցած:

Դեպքի փաստվ ոստիկանության Մաշտոցի բաժնում կազմվել են փաստաթղթեր, որոնք փոխանցվել են ՀՀ Քննչական կոմիտեի Երևան քաղաքի քննչական վարչության Աջափնյակ և Դավիթաշեն վարչական շրջանների քննչական բաժին։

Ուկրաինան բանակցություններ է վարում Ադրբեջանից Եվրամիություն բնական գազի մատակարարման շուրջ, քանի որ ձգտում է պահպանել իր դերը որպես տարանցիկ երկիր: Այս մասին հայտարարել է նախագահ Վլադիմիր Զելենսկին, գրում է Bloomberg-ը։

Զելենսկին ասել է, որ ռուսական գազը ադրբեջանականով փոխարինելու համաձայնագիրը «առաջարկներից մեկն է», որը քննարկվում է։ «Այդպես են անում պաշտոնյաները հիմա»:

Եվրոպան փորձում է հրաժարվել ռուսական գազից Մոսկվայի ներխուժումից հետո, սակայն որոշ եվրոպական երկրներ շարունակում են այն ստանալ Ուկրաինայով հատող խողովակաշարով, գրում է «Ուկրաինսկա պրավդան»։ Տարանցման համաձայնագրի ժամկետը լրանում է 2024 թվականի վերջին, և քանի որ պատերազմը դեռ շարունակվում է, շուկայի շատ դիտորդներ ակնկալում են գազի հոսքերի դադարեցում:

«Այժմ դիտարկվում են այլընտրանքային քայլեր, թե ինչպես կարող ենք գազամուղն օգտագործել մեկ այլ գազամատակարարի, այլ երկրի հետ։ Բանակցությունները շարունակվում են»,- ասել է Զելենսկին։ «Մենք չենք ցանկանում շարունակել գազի պայմանագիրը Ռուսաստանի Դաշնության հետ։ Մենք չենք ուզում, որ այստեղ փող աշխատեն»:

Գազի եվրոպական հենանիշային գները նվազել են նախագահի հայտարարությունից հետո՝ օրական կորուստները պահելով 33 եվրոյից ցածր մեկ մեգավատ ժամում։

Ուկրաինայի «Նավթոգազ» պետական ​​էներգետիկ ընկերության և ռուսական «Գազպրոմ» ՓԲԸ-ի միջև գործող պայմանագիրը ստորագրվել է 2019թ. Bloomberg News-ն առաջին անգամ հայտնել է անցյալ ամիս, որ եվրոպացի պաշտոնյաները բանակցություններ են վարում Ուկրաինայի տարածքով գազի մատակարարումը երկարաձգելու շուրջ:

Մարդու իրավունքների պաշտպան Անահիտ Մանասյանը Ստրասբուրգ կատարած աշխատանքային այցի շրջանակներում հուլիսի 3-ին հանդիպել է Եվրոպայի խորհրդի Ժողովրդավարության և մարդկային արժանապատվության հարցերով գլխավոր տնօրեն Մարյա Ռուտանենի հետ։ Հայտնում են ՀՀ ՄԻՊ գրասենյակից:

Պաշտպանը ներկայացրել է մարդու իրավունքների մի շարք բնագավառներում առկա խնդիրները, անդրադարձ կատարել իրավահավասարության երաշխավորման և հակախտրականության ոլորտում առկա մարտահրավերներին։ Այս համատեքստում Պաշտպանն ընդգծել է ատելության խոսքի, խտրականության, անհանդուրժողականության մթնոլորտի հաղթահարման, այս ոլորտում կրթության համակարգի ամբողջական վերափոխման նպատակով լայնածավալ աշխատանքներ իրականացնելու կարևորությունը:

Զրուցակիցներն անդրադարձել են Ստամբուլյան կոնվենցիայի կարևորությանը և վերահաստատել կանանց նկատմամբ և ընտանեկան բռնության կանխարգելմանն ու դրա դեմ պայքարի իրենց հանձնառությունը:

Պաշտպանն ընդգծել է նաև ազգային փոքրամասնությունների, հաշմանդամություն ունեցող անձանց իրավունքների պաշտպանության և խթանման, գենդերային հավասարության երաշխավորման ոլորտում լուրջ աշխատանքներ իրականացնելու կարևորությունը, անդրադարձել իր կողմից նշված բնագավառներում կատարած աշխատանքներին, ընդգծել Մարդու իրավունքների պաշտպանի 2023 թվականի տարեկան հաղորդման առանձնահատկությունը` նկատի ունենալով այն, որ վերջինիս շրջանակներում իրավահավասարության և հակախտրականության հարցերը ներկակացված են նոր մեթոդաբանությամբ և ժամանակակից միջազգային չափանիշները նկատի ունենալով։

Պաշտպանը կարևորել է նաև տարբեր կրոնական համոզմունքներ ունեցող անձանց իրավունքների պաշտպանության կառուցակարգերը կատարելագործելու անհրաժեշտությունը։

Անահիտ Մանասյանը բարձր է գնահատել խտրականության դեմ պայքարի ոլորտում Մարդու իրավունքների պաշտպանի և Եվրոպայի խորհրդի միջև համագործակցության մակարդակը՝ պատրաստակամություն հայտնելով ընդլայնելու փոխգործակցությունը:

ՀՀ քննչական կոմիտեի ՀԿԳ քննության գլխավոր վարչության մարդկանց թրաֆիքինգի, անչափահասների սեռական անձեռնմխելիության դեմ ուղղված և թմրամիջոցների ապօրինի շրջանառության հանցագործությունների քննության վարչությունում իրականացված քննությամբ բացահայտվել է Արարատի մարզի բնակչին աշխատանքային թրաֆիքինգի ենթարկելու դեպք։

Ձեռք բերված փաստական տվյալների համաձայն՝ Երևանի 55–ամյա բնակիչը, 2018թ․ մայիսին տեղեկանալով Արարատի մարզի 47–ամյա բնակչի և վերջինիս ընտանիքի անդամների սոցիալապես անապահով լինելու, աշխատանք կամ որևէ այլ զբաղմունք կամ մասնագիտություն չունենալու, անչափահաս երեխային նվազագույն կենցաղային պայմանների ապահովման համար միջոցների հայթայթման անհնարինության, եկամտի այլ աղբյուրների բացակայության մասին, օգտագործելով այդ հանգամանքներով պայմանավորված վերջինիս մոտ առաջացած վիճակի խոցելիությունը, առաջարկել է նրան Արարատի մարզի Հայանիստ գյուղում գտնվող անասնաֆերմայի տարածքում կատարել անասնապահի աշխատանք՝ խոստանալով վճարել ամսական 80.000-150.000 ՀՀ դրամ աշխատավարձ և տրամադրել բնակության կացարան։ Վերջինս, համաձայնելով առաջարկին, 2018թ. հունիսից ընտանիքի հետ տեղափոխվել ու բնակվել է հիշյալ անասնաֆերմայի տարածքում գտնվող շինությունում:

Շուրջ երկու ամիս նշված վայրում աշխատելու ընթացքում 55–ամյա տղամարդը 47–ամյա տղամարդուն չի վճարել աշխատավարձ, իսկ 5 հատ գոճիների սատկելուց հետո ծեծի է ենթարկել նրան՝ պահանջելով դրանց դիմաց վճարել 2.000.000 ՀՀ դրամ գումար կամ երեքից հինգ տարի անվճար աշխատել իր համար։ Սպանության ու առողջությանը վնաս պատճառելու սպառնալիքներ հնչեցնելով՝ նա 47–ամյա տղամարդուն ստիպել է կազմել ձեռագիր փաստաթուղթ՝ 5 տարի ժամկետով անասնապահի աշխատանք կատարելու մասին, հակառակ պարագայում նա պետք է վճարի 55–ամյա տղամարդու կողմից վերցված բոլոր վարկերի գումարները և տարաժամկետ վճարման պայմանով ձեռք բերված բնակարանի գումարը:

Դրանից կարճ ժամանակ անց 47–ամյա տղամարդու կինը մանկահասակ երեխայի հետ հեռացել է նշված վայրից, իսկ 2018թ․ նոյեմբերի վերջերին, 55–ամյա տղամարդու պահանջով, անասնապահությունը շարունակելու և ստանձնած պարտավորությունները կատարելու համար 47–ամյա տղամարդը մոր հետ տեղափոխվել է Կոտայքի մարզի Նոր Գեղի գյուղ, որտեղ բնակվել են անասնագոմի մեջ առանձնացված սենյակում՝ զուրկ կենցաղային տարրական պայմաններից:

55–ամյա տղամարդը, 47–ամյա տղամարդու անձնական կախվածությունը և վիճակի խոցելիությունն օգտագործելով, վերջինիս շահագործումը շարունակելու նպատակով, 2018թ․ նոյեմբերից մինչև 2023թ․ սեպտեմբերն ընկած ժամանակահատվածում պարբերաբար բռնություն է կիրառել վերջինիս նկատմամբ՝ ձեռքերով հարվածներ հասցնելով նրա մարմնի տարբեր հատվածներին, սպանության, առողջությանը վնաս պատճառելու սպառնալիքներ և հայհոյանքներ  հնչեցնելով ստիպել է, որ բացի անասնապահի աշխատանքից, կատարի նաև շինարարական աշխատանքներ և ապահովի անասունների բուժումը։

Անասունների սատկելու դեպքում 55–ամյա տղամարդը մեղադրել է 47–ամյա տղամարդուն և նշել, որ վերջինիս 2.000.000 ՀՀ դրամ գումարը շուրջ 5 տարվա աշխատանքի արդյունքում ոչ թե պակասել է, այլ ավելացել՝ դառնալով 15.000.000 ՀՀ դրամ, ընդ որում, նշված տարիների ընթացքում 47–ամյա տղամարդն իր կատարած աշխատանքի դիմաց ստացել է ընդամենը շուրջ 25.000 ՀՀ դրամ գումար:

Այդ ընթացքում 55–ամյա տղամարդը, շարունակելով իր հանցավոր գործողությունները, 2019 թվականի սեպտեմբերին, որպես պարտավորությունների կատարում, ինչպես նաև 47–ամյա տղամարդու նկատմամբ մեղմ վերաբերվելու դիմաց, պահանջել է իրեն փոխանցել վերջինիս մոր կենսաթոշակի գումարը։ Արդյունքոմ՝ մինչև 2023 թվականի օգոստոս ամիսը 47–ամյա տղամարդը նրան է փոխանցել շուրջ 2.075.000 ՀՀ դրամ գումար:

Արարատի մարզի բնակչին հաջողվել է ստեղծված շահագործման վիճակից դուրս գալ միայն այն ժամանակ, երբ ՀՀ ՆԳՆ ոստիկանությունում նշվածի կապակցությամբ ստացվել են համապատասխան օպերատիվ տեղեկություններ, ինչից հետո վերջինս և նրա մայրը ներկայացրել են համապատասխան հաղորդումներ:

Ձեռք բերված բավարար փաստերի հիման վրա 55–ամյա տղամարդուն մեղադրանք է ներկայացվել՝ ՀՀ քրեական օրենսգրքի 188-րդ հոդվածի 1-ին մասով: Նրա նկատմամբ որպես խափանման միջոց է ընտրվել բացակայելու արգելքը։

Նախաքննությունն ավարտվել է, քրեական վարույթի նյութերը, մեղադրական եզրակացությամբ, ուղարկվել են հսկող դատախազին՝ հաստատելու և դատարան ուղարկելու համար։

Ռուսաստանի նախագահ Վլադիմիր Պուտինը Թուրքիայի նախագահ Ռեջեփ Թայիփ Էրդողանին խոստացել է գնալ Թուրքիա՝ մասնակցելու բանակցություններին։

Աստանայում կայացած զրույցի ժամանակ Էրդողանն ասել է, որ Պուտինին սպասում է Թուրքիայում «ամենասեղմ ժամկետում»։

«Ես անպայման կգամ»,- պատասխանել է Պուտինը և շնորհակալություն հայտնել թուրք գործընկերոջը։

Հայաստանում գործում են օֆշորային սխեմաներ և բավականին լայն տարածում ունեն։ Հանրային հեռուստաընկերությանը տված հարցազրույցում այս մասին ասել է ՊԵԿ նախագահ Ռուստամ Բադասյանը՝ անդրադառնալով Հայաստանում օֆշորային սխեմաների մասին հարցին։

«Այո, գործում են և բավականին լայն տարածում ունեն։ Երկիրը կարող է նաև օֆշորային երկիր չլինել, բայց իր հետ կնքված կրկնակի հարկումը բացառող համաձայնագիրը որոշակի առավելություններ կարող է տալ։ Կրկնակի հարկումը բացառող համաձայնագրերի իմաստն այն է, որ նույն տեսակի եկամուտը երկու երկրում չհարկվի։ Բայց կան իրավիճակներ, որ այդ համաձայնագրերն այնպես են կիրառվում, որ ստացվում է կրկնակի չհարկում՝ ոչ այնտեղ, ոչ այստեղ։

Եվ մենք ուսումնասիրություն ենք արել 2019-2021 թվականների համար ու արձանագրել ենք, որ շուրջ 3 տարվա կտրվածքով 616 միլիարդ դրամի եկամուտ է Հայաստանից վճարվում ոչ ռեզիդենտներին, որոնք կամ չեն հարկվում, կամ հարկվում են նվազ դրույքաչափերով։ Ընդ որում, այդ թվի մեջ միանշանակ կան այնպիսի դեպքեր, երբ երկու կողմից էլ չեն հարկվում»,- նշել է Բադասյանը։

Նրա խոսքով՝ Արաբական Միացյալ Էմիրությունների, Լյուքսեմբուրգի և Կիպրոսի հետ կնքված կրկնակի հարկումը բացառող համաձայնագրերը լուրջ խնդիրներ են առաջացնում։

«Մենք նախնական գնահատական ունենք, թե որքան կորուստը կարող է լինել․ խիստ նախնական գնահատականներով մոտ 50-60 միլիարդ դրամի գումար կա, որը պետք է հարկվի»,- ընդգծել է ՊԵԿ նախագահը։

Մեդիափորձագետ Սամվել Մարտիրոսյանը հայտնել է, որ զանգերի միջոցով խաբեություն է տարածվում:

«Նոր տարափ է սկսվել։ Շատ սիրուն հայերենով զանգում են ձեր բանկի կամ էլկետրոնային դրամապանակի անունից։ Դուք հնարավոր է տեսնեք, որ ձեզ զանգում են հենց ձեր բանկից, որովհետև հեռախոսահամարները կեղծում են։ Ասում են, թե խնդրի առաջ եք կանգնած, թե ինչ-որ հանցագործներ ձեր հաշվեհամարով վարկ են ձևակերպում։

Ասում են՝ հեսա կոդ կուղարկենք, դա ասեք։ Իրականում, զանգողը հենց այդ վարկը ձևակերպողն է։ Մարդուց անհրաժեշտ ինֆորմացիան վերցնում են ու վարկը ձևակերպում»,- զգուշացրել է Մարտիրոսյանը։

Մեդիափորձագետը հորդորել է հիշել, որ ոչ մի բանկ կամ ֆինանսական այլ կազմակերպություն հաճախորդից գաղտնաբառ չի պահանջում։

Մանրամասները՝ տեսանյութում։