Այս պահին Հայաստանի ԱԺ նիստերի դահլիճում անվտանգային խիստ միջոցներ են ձեռնարկում, հավաքել են ջրի շշերը:

Նիկոլ Փաշինյանի անվտանգության աշխատակիցները աթոռներն են ստուգում, անգամ լրագրողներին մինչև նիստի սկիզբը թույլ չեն տալիս իրենց հատկացված օթյակում նստել:

Հիշեցնենք, որ այսօր ԱԺ-ում տեղի է ունենալու կռավարության հետ հարցուպատասխան, ներկա է լինելու Նիկոլ Փաշինյանը:

Բացի այդ, Բագրատ Սրբազանը հայտարարել է, որ այսօր կարեւոր անելիք ունեն եւ խնդրել է քաղաքացիներին ժամը 15-ին լինել Բաղրամյան պողոտայում:

Ընդդիմությունն ասում է, որ ամսի 17֊ին ժամը 18։30 ԱԺ արտահերթ նիստն իրավունքի ուժով իրագործվելու է. մնում է, որ Քաղաքացիական պայմանագիրն ունենա կամք և գա այդ նիստին։ Չի ասում, որ ունենա կամք ու չգա այդ նիստին, ի՞նչ է լինելու։ Այս մասին «Ֆեյսբուք»-ի իր էջում գրել է ԱԺ փոխնախագահ Հակոբ Արշակյանը՝ շարունակելով․

«Մի կողմ թողնենք այն, որ ընդդիմությունը որևէ նոր բան չի արել. ընդամենը բերել է մի հայտարարություն, որի մեջ փորձել են ամփոփել տարիներ շարունակ ելույթներով, հանրահավաքներով, բողոքի ակցիաներով արտահայտած իրենց ասելիքը։ Միակ տարբերությունն այն է, որ այդ ասելիքն այժմ էլ անվանափոխել և կնքել են Գալստանյանի անունով, իսկ նման հայտարարության ընդունումը կամ չընդունումը որևէ իրավական հետևանք չունի։

Շատ ավելի կարևոր է այն, որ ԱԺ որևէ հայտարարություն ընդունելու համար անհրաժեշտ ձայներ ապահովելու համար պետք է նախ ապահովել նիստի քվորումը, որը 54 պատգամավորի ներկայություն է պահանջում, իսկ այս պահին ներկայացված հայտարարության տակ կա ընդամենը 33 ստորագրություն... Էլ չեմ խոսում քվեարկության անհրաժեշտության մասին։

Սա նույնն է, ինչ ընդդիմությունն ասեր, թե իրենք անվստահություն են հայտնում կառավարությանը, և դրա համար պետք է, որ իշխող քաղաքական մեծամասնությունը միանա իրենց և անվստահություն հայտնի իր իսկ ձևավորած կառավարությանը։

Համաձայնեք, որ սա ծիծաղելի է։

Ամփոփելով` ցանկանում եմ Գալստանյանին տեղեկացնել, որ ԱԺ հերթական ընտրությունները նախատեսված են 2026 թ. ամռանը, իսկ մինչ այդ պետք է կուսակցություն գրանցել կամ համալրել որևէ կուսակցության շարքերը, կազմել նախընտրական ցուցակ, գրել նախընտրական ծրագիր և պատրաստվել ընտրապայքարի։

Ի դեպ Կանադայի անձնագրի հետ էլ հավանաբար մի բան պիտի արվի, կամ գուցե ճշտեք Կանադայի ընտրությունների ժամկետներն ու ընթացակարգերը»։

Ուկրաինայի ամբողջ տարածքում մի քանի ժամում երկու անգամ օդային տագնապ է հայտարարվել։ Այս մասին հաղորդում է ՌԻԱ Նովոստին՝ հղում անելով Ուկրաինայի թվային փոխակերպման նախարարության առցանց քարտեզներին։

Նախարարության քարտեզների համաձայն՝ առաջին անգամ Ուկրաինայի ամբողջ տարածքում օդային տագնապի ազդանշան է հնչել Մոսկվայի ժամանակով ժամը 03։29-ին։ Օդային ռմբակոծման նախազգուշացումը երկրորդ անգամ հայտարարվել է ժամը 06։15-ից։ 

Ըստ ուկրաինական լրատվամիջոցների՝ օդային տագնապի հայտարարման ֆոնին պայթյունների ձայներ են լսվել Օդեսայում և Կիևում։

Ռուսաստանի զինված ուժերի ուկրաինական ենթակառուցվածքի վրա հարձակումները սկսվել են 2022 թվականի հոկտեմբերի 10-ին՝ Ղրիմի կամրջի վրա տեղի ունեցած ահաբեկչությունից երկու օր անց, որի հետևում, ըստ Ռուսաստանի իշխանությունների, կանգնած են ուկրաինական հատուկ ծառայությունները։ Հարվածները հասցվում են ամբողջ երկրի էներգետիկայի, պաշտպանական արդյունաբերության, ռազմական հրամանատարության և կապի օբյեկտներին։

Իսրայելի անանուն պաշտոնյան Reuters-ին հայտնել է, որ պաղեստինյան ՀԱՄԱՍ շարժումը մերժել է պատանդներին ազատ արձակելու առաջարկը։ Այս առաջարկը Գազայի հատվածում հրադադարի հաստատման վերաբերյալ ԱՄՆ նախագահ Ջո Բայդենի ծրագրի մի մասն էր, որն ընդունվել էր հունիսի 11-ի գիշերը ՄԱԿ-ի Անվտանգության խորհրդի կողմից։

«Այսօր երեկոյան Իսրայելը միջնորդի միջոցով պատասխան է ստացել ՀԱՄԱՍ-ից։ Իր պատասխանում ՀԱՄԱՍ-ը մերժել է պատանդներին ազատ արձակելու առաջարկը, որը ներկայացրել է նախագահ Բայդենը։ Նրանք փոխել են բոլոր հիմնական և կարևորագույն պարամետրերը»,- ասել է գործակալության զրուցակիցը, որը ցանկացել է անանուն մնալ։

Մինչդեռ ՀԱՄԱՍ-ի պաշտոնյան, որը ևս հրաժարվել է ներկայանալ, Reuters-ին ասել է, որ պատասխանը վերահաստատում է շարժման այն դիրքորոշումը, որ հրադադարը պետք է հանգեցնի Գազայում ռազմական գործողությունների մշտական դադարեցմանը, իսրայելական ուժերի դուրսբերմանը, պաղեստինյան անկլավի վերականգնմանը և Իսրայելում պաղեստինցի գերիների ազատմանը:

«Մենք կրկնել ենք մեր նախկին դիրքորոշումը: Կարծում եմ, որ մեծ բացեր չկան: Գնդակն այժմ Իսրայելի դաշտում է», - ասել է ՀԱՄԱՍ-ի աղբյուրը:

Ավելի վաղ ՀԱՄԱՍ-ը հայտարարություն էր տարածել՝ ողջունելով ՄԱԿ-ի Անվտանգության խորհրդի ընդունած բանաձևը։ Հունիսի 10-ին ՄԱԿ-ի Անվտանգության խորհուրդն ընդունել է ԱՄՆ-ի ներկայացրած բանաձևը՝ Գազայի հատվածում հրադադարի հաստատման փուլային ծրագրի վերաբերյալ։ Բանաձևին կողմ է քվեարկել 15 երկրից 14-ը։ Բանաձևը կոչ է անում դադարեցնել կրակը, ազատ արձակել ՀԱՄԱՍ-ի մոտ պահվող պատանդներին և Իսրայելի բանակը դուրս բերել անկլավից։ Այն նաև մերժում է Գազայի ժողովրդագրական կամ տարածքային փոփոխությունները:

«Տավուշը հանուն հայրենիքի» շարժումը հայտարարություն է տարածել՝ անդրադառնալով այսօր՝ հունիսի 12-ին սպասվող հանրահավաքին․

«Սիրելի հայրենակիցներ, կարևոր գործ ունենք անելու։ Պետք է մոբիլիզացնել բոլոր ուժերը և ամեն ինչ անել, որպեսզի 15։00-ին Բաղրամյան պողոտան հեղեղվի արժանապատիվ քաղաքացիներով։

Եկեք միասին իրազեկման ակցիա անենք համացանցում՝ սոցիալական ցանցերի մեր էջերում կոչերով հանդես գանք և ամեն ինչ անենք, որպեսզի մեր բոլոր մտերիմները հունիսի 12-ին, ժամը 15։00-ին լինեն Բաղրամյան պողոտայում։ Ի գործ։

Հայ, Հայաստան, Հայրենիք ու Աստված»,- նշվում է Շարժման հայտարարության մեջ։ 

«Հրապարակ» թերթը գրում է. «Մեր տեղեկություններով, վարչապետի աշխատակազմից երեկ գրություններ են հասցեագրվել պետական մի շարք գերատեսչությունների՝ տեղեկացնելով բյուջեի կատաստրոֆիկ վիճակի մասին։ Կառավարությունն առաջարկել է բոլոր ոչ առաջնահերթ ծախսերը կրճատել, կապիտալ ծրագրերը հետաձգել, քանի որ ֆինանսական խնդիրների առջեւ են կանգնած: Գերատեսչություններին առաջարկվել է ֆիննախի հետ քննարկումներով հասկանալ, թե ծախսերի որ ուղղությունները հնարավոր չէ չիրականացնել` միայն դրանք շարունակել, քանի որ կառավարության ընդունած բազում որոշումների ֆինանսավորման հարցում խնդիրներ կան։

Կառավարության մեր աղբյուրները մատնանշում են, որ, դիցուք, ՊՆ ծառայողների, ուսուցիչների ատեստավորման ծրագրերը, 2024-2027 թթ․ պետական միջնաժամկետ ծրագրով ամրագրված քաղաքականությունը հնարավորություն չի տալիս հիշյալ ծրագրերը լիարժեք իրականացնելու, ուստի տեղեկացրել են՝ եթե չկրճատեն այլ ծախսերը, ապա կառավարությունը խնդիր է ունենալու անգամ արդեն ատեստավորվածներին վճարելու մասով»:

Մանրամասները՝ այստեղ։

«Ժողովուրդ» օրաթերթը գրում է. «ԱԺ պատգամավոր Արմեն Խաչատրյանը «նախկին թալանչիների» ժամանակ զբաղեցնում էր բավականին բարձր պաշտոն ՆԳ համակարգում եւ կարծես մինչեւ 2018 թվականը ոչ մի անգամ բարձրաձայն կամ ցածրաձայն չի դժգոհել առկա բարքերից։

Փոխարենը այժմ, մասնավորապես նրա որդին՝ փորձագետից արագ «վերածվել» է «ՀՀ փորձագիտական կենտրոն» ՊՈԱԿ-ի կարեւորագույն բաժիններից մեկի պետի, աշխատավարձն էլ նախորդ տարվա նկատմամբ ավելացել է 1.2 միլիոն դրամով։

Իհարկե, Նիկոլ Փաշինյանը չի ստել` «Ապագա կա՛»։ Եվ այդ ապագան ՔՊ-ականների համար է»։

Ավելին՝ «Ժողովուրդ» թերթի այսօրվա համարում։ 

«Ժողովուրդ» օրաթերթը գրում է. «ՀՀ Կառավարությունը հեղինակել է «Ոստիկանության գվարդիայի մասին» եւ հարակից օրենքների նախագծերի ընդունման փաթեթ, որը, ըստ իրավական ակտերի նախագծերի հրապարակման միասնական կայքում տեղադրված նախագծերի փաթեթի, «ուղղված է զուտ ոստիկանական ծառայության ստեղծմանը՝ միջազգային ստանդարտներին համապատասխանող նոր սպառազինությամբ ու վերապատրաստված անձնակազմով, որին կվերապահվեն հասարակական կարգի պահպանության եւ հասարակական անվտանգության ապահովման, պետական շենքերի եւ կարեւորագույն օբյեկտների պահպանության, պետական արարողակարգով նախատեսված պատվիրակությունների ուղեկցման, ինչպես նաեւ ռազմական եւ արտակարգ դրության իրավական ռեժիմի ապահովման ու այլ գործառույթներ»: Թվում է՝ առաջադեմ մի նախագիծ է, բայց, «թաքնված» լուրջ հարց է լուծում այդ նախագիծը:

Ներկայացնենք փոքր-ինչ ավելի մանրամասն. ոստիկանության գվարդիան ոստիկանության կառուցվածքային ստորաբաժանում է, որը կոչված է պաշտպանելու անձի իրավունքները եւ ազատությունները, ինչպես նաեւ ապահովելու հասարակության եւ պետության անվտանգությունը:

Այնինչ կա եւս մի կետ, որը հակասում է Հայաստանի պատմության մեջ եղած բոլոր օրենքներին։

Մասնավորապես այն հատվածը, որը սահմանում է «Ռազմական դրության իրավական ռեժիմի մասին օրենքում լրացումեր կատարելու մասին» օրենքի նախագծի օրենքի 9-րդ հոդվածի 2-րդ մասի լրացում. այն սահմանում է՝ «նախատեսված գործառույթները ոստիկանության մարմինները պետք է իրականացնեն զինված ուժերի եւ այլ զորքերի ուժերի կիրառման եւ (կամ) մարտական գործողությունների վարման շրջանները չընդգրկող տարածքներում։

Այսինքն՝ այսուհետ ռազմական դրության եւ պատերազմի ժամանակ սահմանային գոտում ՀՀ ներքին զորքերն այլեւս պետական սահմանի պաշտպանություն չեն իրականացնելու։

Նրանց պաշտպանական գործառույթի սահմանը չի ներառելու ՀՀ պետական սահմանը։ Այսինքն՝ ոստիկանները, իսկ ավելի կոնկրետ՝ միայն գվարդիան էլ սահման չի գնա նույնիսկ պատերազմի օրերին:

Նշանակում է՝ 44-օրյա պատերազմի ընթացքում ՆԳՆ զորքերի կատարած ծառայությունը, որը ի նպաստ հայրենիքի պաշտպանության էր, այսուհետ չի լինի. նրանք կծառայեն միայն ի նպաստ ՀՀ իշխանությունների անձերի պաշտպանության։

Ստացվում է՝ Նիկոլ Փաշինյանն ամեն դեպքում փորձում է սեփական աթոռը պահել՝ բռնի ուժ կիրառելով։

Հավելենք, որ ոստիկանության գվարդիայի ընդհանուր ղեկավարումն իրականացնում է ոստիկանության պետը, իսկ անմիջական ղեկավարումը՝ ոստիկանության գվարդիայի հրամանատարը:

Վերը նշված օրենքում փոփոխություններ կատարելը, բացի իշխանությունը բռնի ուժով սեփական ձեռքերում պահելու տողատակեր ունենալուց, ունի նաեւ նշված օրենքից որոշակի ֆինանսական միջոցներ կուտակելու պլաններ՝ հօգուտ պետության։

Օրենքում ներառված է կետ, որի համաձայն՝ ՀՀ կառավարության կողմից սահմանված պետական պահպանության ենթակա պետական մարմինների եւ կազմակերպությունների շենքերն ու շինությունները եւ կարեւորագույն նշանակության օբյեկտները պահպանելիս, ինչպես նաեւ հատուկ բեռների տեղափոխման անվտանգությունն ապահովելիս ոստիկանության գվարդիան լիազորված է։

Սրան զուգահեռ, հոդված 9-ի 2-րդ կետով սահմանվում է նախատեսված լիազորությունները, որ ոստիկանության գվարդիան իրավասու է իրականացնել նաեւ պայմանագրային հիմունքներով, եթե համապատասխան շենքը, շինությունը, այլ օբյեկտը, տրանսպորտային միջոցը կամ բեռը պատկանում են մասնավոր անձանց:

Ստացվում է՝ ոստիկանական գվարդիան իրականացնելու է նաեւ պայմանագրային-վճարովի ծառայություններ, որպեսզի տպավորություն չստեղծվի, թե գվարդիան ստեղծվել է իշխանության անվտանգության պահպանության համար։ Նաեւ «պատվերով», «պամյանագրով» կգործի:

Ի դեպ, «Ոստիկանության գվարդիայի մասին» նախագիծը ՀՀ ՆԳ փոխնախարար Արփինե Սարգսյանը երեկ ԱԺ-ում ներկայացրել է, սակայն ԱԺ հարցուպատասխանի պատճառով քվեարկությունը եւ հարցի քննարկումը կշարունակվեն այսօր կայանալիք նիստում»։

Մանրամասները՝ «Ժողովուրդ» օրաթերթի այսօրվա համարում: